طرحة الفرح - جمالك من جمال طرحتك

طرحة الزفاف وكل اللى يهمك

طرحة زفافك علينا

بتدوري على طرحة مناسبة لفستان فرحك!!!!
نِفسك في حد يساعدك بأفكار بسيطة وجديدة في نفس الوقت علشان تقدري تختاري الطرحة المناسبة ليكي!!!!
ولا يهمك من أي حاجة طول ما إحنا موجودين،
وده لأننا قررنا النهارده إننا نتعرف مع بعض على كل حاجة تخص طرحة الزفاف
تعالِ نشوف مع بعض

طرحة الزفاف قديما كانت لتجنب سوء الحظ

مين يصدق إن طرحة الزفاف اللي النهارده تعتبر من الإكسسوارات كانت هي أهم حاجة العروسة تفكر فيها وتجيبها زمان، حتى قبل فستان الفرح نفسه؛ وده لأن الطرحة زمان كانت شيء ضروري جدا جدا؛ وده لأنه كان من المعتقدات زمان إن من سوء الحظ إن العريس يشوف وجه العروسة قبل إتمام مراسم الزفاف ومن هنا جاءت فكرة الطرحة علشان تغطي وجه العروسة والعريس مايشوفهاش إلا بعد انتهاء مراسم الزفاف.
وبكده جاءت فكرة الطرحة اللي النهارده هي من الإكسسوارات الأساسية اللي مفيش بنت دلوقتي تقدر تستغنى عنها وبقى من طقوس الفرح إن العروسة تغطي وجهها ولما ييجي العريس هو اللي يشيل الطرحة دي وكل المعازيم تصفق...

اختيار الطرحة هيكون بعد الفستان على طول
شوفي يا عروسة علشان تقدري تحددي شكل الطرحة المناسب ليكي بجد يبقى لازم في الأول تختاري الفستان وبعد كده تبدئي في اختيار الطرحة المناسبة وبعدين تختاري تسريحة شعرك ولو كنت محجبة تختاري ربطة حجابك.. وده لأنه من الصعب إيجاد فستان مناسب لطرحة معينة لكن من السهل طبعا إنك تلاقي طرحة مناسبة للفستان..

للطرح أشكال كتيرة

فيه أكتر من شكل للطرحة، ففيه مثلا:

الطرحة الطويلة

ودي بتعتبر الشكل التقليدي للطرحة وطول الطرحة بيكون أطول من الفستان أو بنفس طول الفستان والشكل ده بنلاقي منه طرحة طبقة واحدة طويلة أو تلاقي طرحة طبقتين طبقة طويلة وطبقة تانية قصيرة علشان العروسة تغطي بيها وجهها..

الطرحة متوسطة الطول

ودي طولها بيكون واصل لغاية منطقة الركبة.. ودي بتكون برضه إما طبقة واحدة أو طبقيتن أو ثلاث طبقات أو أكتر..
الطرحة القصيرة

الاول الثانى

ودي فيه منها شكلين

الشكل الأول:
بيكون طول الطرحة فيه واصل لغاية منطقة الأرداف بالضبط أو فوق منطقة الأرداف بحاجة صغيرة جدا والشكل ده مناسب جدا للعروسة اللي منطقة الوسط عندها عريضة، والشكل ده بيكون طبقتين أو أكثر.
والشكل التاني

بيكون طول الطرحة فيه واصل لغاية منطقة الكوع والشكل ده بيكون طبقتين أو أكتر.

الطرحة القصيرة جدا

ودي طول الطرحة فيها بينتهي عند الأكتاف ودي بتناسب العروسة اللي جسمها متناسق مع بعضه يعني لا هي طويلة ولا هي قصيرة ولا هي مليانة ولا هي رفيعة..
والشكل ده من الطرحة بيكون طبقتين أو أكتر..

أنواع قماش الطرحة

فيه أكتر من نوع لقماش الطرحة ففيه "الحرير" وفيه "التول" وده كل الناس بتفضّله؛ لأنه خفيف وشكله حلو في التطريز وفي "البوليستر"...

واختيار طول الطرحة أو نوع القماش في الآخر بيرجع ليكي إنتي.
بس خدي بالك
علشان اختيارك يكون اختيار سليم للطرحة لازم تاخدي بالك من شوية الحاجات البسيطة دي..

أولا: إنك تجربي أكتر من شكل

شوفي يا عروسة لازم تقيسي الفستان وتجربي عليه أكتر من شكل علشان تقدري إنك تحكمي فعلا على الشكل المناسب ليكي ولفستانك ولازم تراعي إن الطرحة أيا كان طولها تكون مش مغطية على أي تفاصيل موجودة في الفستان..

فمثلا لو كنت هتختاري طرحة تصل إلى منقطة الكوع يبقى لازم يكون الفستان قطعتين ويكون طولها ينتهي مع بداية جوب الفستان بكده فعلا الطرحة دي هتبرز جمال الفستان وهتبين تفاصيله.

ثانيا: إن لون الطرحة يكون مناسب للون الفستان

اختاري لون الطرحة المناسب للون فستانك طبعا إنت هتقولي دلوقتي إن فستان الزفاف طبيعي بيكون أبيض بس إحنا قصدنا إن الأبيض ده درجات ففيه الأبيض ناصع البياض وفيه الأبيض اللي مدّي على "أوف وايت" شوية وفيه الأبيص المصفر أو الشاحب علشان كده يا ريتك تخلي الطرحة أفتح درجة من لون الفستان وخدي بالك أن يكون التطريز اللي في الطرحة زي التطريز اللي في الفستان أو مشابه له بدرجة كبيرة بحيث يكون فيه تناغم بين الاتنين.

ثالثا: اختاري إكسسوارات مناسبة للطرحة

خدي بالك إنك تختاري إكسسوارات مناسبة للطرحة فمثلا لو كنت عايزة تلبسي طرحة طويلة يبقى حطي على راسك تاج لكن لو كنت هتلبسي طرحة قصيرة يبقى من الأحسن إنك تستخدمي مشابك الشعر..
ولازم تتأكدي من نوع الطرحة والمشبك يعني لو الطرحة مثلا تقيلة لازم تكوني واثقة من إن المشبك يستطيع أن يحملها..

ولازم تتأكدي قبل الفرح كويس إن الطرحة ثابتة في راسك علشان تفضل ثابتة في راسك طول الفرح وماتقعش منك...
ولو كنت محجبة يبقى تختاري لون الحجاب زي لون الطرحة بالضبط

رابعا: حافظي على نظافة الطرحة

يا ريت تحافظي على نظافة طرحتك وفستانك وبلاش كل ما حد ييجي لك البيت قبل الفرح تفرجيه عليها...
يعني من الآخر كده من ساعة ما تشتري الفستان والطرحة خليهم في الشنطة المخصصة ليهم لغاية يوم الفرح واللي يسألك عليهم قولي لهم إنك مخلياهم مفاجأة.

ودى مجموعه من الاشكال ممكن تبصى عليها

]

]

ودى مجموعه طرح ولفاتها للعرايس المحجبات

[b][b] [b]

[
ولغاية هنا وخلص كلامنا النهارده
بس قبل ما نقول سلام
عايزين نقول ألف مليون مبروك لكل العرايس اللي على وش زفاف
وعقبال باقي البنات
لكم كل تحياتى حبوبة

حلوين قوى يابيبة

» شعرك تاج جمالك
» جمالك بمريلة المطبخ - كوني انيقة في مطبخك